Publications
Partners
Johannesburg. - Die telekommunikasie-maatskappy Huge Group het Dinsdag aangekondig hy
is weer winsgewend.
Hy het ’n verwaterde wesensverdienste per aandeel van 8,79c aangekondig vir die jaar geëindig in Februarie 2010.
Dit kom ná ’n verlies van 5,46c per aandeel ’n jaar
gelede.
Die maatskappy sê hy het ’n tussentydse verlies teen die helfte van
die jaar omgedraai met ’n jaareinde-wins van R8 miljoen.
Die groep se netto wins voor belasting vir die tweede helfte van
die jaar was R19,2 miljoen en na belasting R13,8 miljoen.
Die omdraai van die eerste helfte se verlies van R5,8 miljoen het
’n netto wins na belasting van R8,1 miljoen vir die jaar gelewer.
Die groep sê die herstel is hoofsaaklik te wyte aan ’n suksesvolle
herstrukturering waarin die groep se twee telekommunikasie-eenhede, TelePassport
en CentraCell, in Huge Telecom saamgevoeg is.
Huge Telecom, die groep se grootste bedryfsafdeling en
inkomste-opwekker het toe ’n 35%-toename in bruto wins behaal in die tweede
helfte van die jaar - wat tradisioneel minder winsgewend is. - I-Net
Bridge
