Johannesburg. – Rolfes Technology Holdings hoop om die JSE se hoofbord rooi – of dalk liewer swart – te verf.
Rolfes vervaardig en versprei verf, ’n wye verskeidenheid ander
chemikalieë en ook silika in Suid-Afrika en die res van die vasteland.
Die maatskappy het gister van die JSE
se alternatiewe bord, die AltX, na die hoofbord oorgeskuif. Hy
het ’n aanvanklike markkapitalisasie van R320 miljoen.
Rolfes het ook onlangs twee nuwe ondernemings gekoop as deel van
sy groeistrategie. AgChem sal na verwagting in die
toekoms ongeveer 25% van Rolfes se omset genereer
en die maatskappy groter blootstelling gee aan die mark vir chemiese produkte in
die landbousektor.
Amazon Colours is ’n bekende vervaardiger van pigmente vir die
verfbedryf en sal Rolfes ook toegang tot ’n nuwe mark gee.
Mnr. Erhard van der Merwe, uitvoerende hoof van Rolfes, sê
notering op die JSE se hoofbord is ook deel
van die maatskappy se groeistrategie. “Ons het in
2007 op die AltX noteer en dit het Rolfes se profiel versterk. Die AltX het ons ’n wonderlike platform gegee vir notering op die hoofbord.”
Rolfes se omset het in die finansiële
jaar tot 30 Junie met 24,8% gegroei tot R460,7 miljoen.
Rolfes doen reeds sake in Zambië en is ook besig om kantore in
Ghana en Kenia oop te maak.
“Takke in Afrika sal toegang verbeter tot ’n verskeidenheid
produkte, waarna daar groot vraag op die vasteland is,” sê hy.