Kaapstad. – Remgro het Woensdag ’n groot tree geneem om sy
portefeulje skoon te maak deur sy R1,4 miljard-belegging in Nampak te koop aan
te bied.
Die Nampak-ooreenkoms sal die derde verandering wees tot Remgro se
R64 miljard-portefeulje ná die verkope van sy belang in Xiacom en die
voorgestelde ontbondeling van sy belang in die Trans Hex-groep.
Die voorgestelde Nampak-verkope is nie so verrassend nie.
Nampak is nie een van Remgro se kern-bedrywighede nie.
Sy R1,4 miljard-belegging het ’n opbrengs van R73 miljoen in Remgro
se wesensverdienste vir die jaar tot einde Maart 2010 getoon.
Mnr. Stephen Meintjies, ontleder by Imara SP Reid, het gesê die
Nampak-ontwikkeling is ’n aanduiding is dat daar ’n volgehoue hersiening van
strategie by Remgro plaasvind.
“Hulle was baie passief vir ’n geruime tyd, iets is definitief
besig om te gebeur by Remgro,” het hy gesê.
Meeste markontleders glo Remgro kyk daarna om van meer van sy
kleiner beleggings ontslae te raak, en sy kernportefeulje van nywerheids-,
finansiële dienste en tegnologie en media-bates te behou.
Gegewe die inligting lyk dit asof Remgro reeds sterk op pad is om
ontslae te raak van sy belang in Dorbyl.
Ander beleggings wat hersien kan word is Wispeco en Total SA.
Remgro het ook ’n klein (persentasiegewys) belang in Impala Platinum Holdings,
wat sowat R5,7 miljard werd is. – Fin24.com