Kaapstad. – Die bedryfsinkomste van die batebestuursgroep Peregrine
Beherend het in die afgelope boekjaar tot einde Maart met 10% gedaal tot
R1,4 miljard.
Dit is deels toegeskryf aan die uitwerking van die sterker rand op inkomste wat oorsee verdien word asook die voortgesette moeilike handelstoestande vir die aandeelmakelary van Peregrine.
Dit is die tweede aandeelmakelary wat vandeesweek verwys het na die moeilike handelstoestande wat nog steeds heers. Cadiz het vroeër die week met die bekendmaking van sy jaarresultate ook verwys na die afname in volume-aandele op die JSE en die termynmark Safex die afgelope jaar.
Die bedryfsinkomste van Peregrine se afdeling vir aandeelmakelary en transaksie-strukturering het in die jaar met 23% gedaal tot R282 miljoen.
Peregrine se bedryfsinkomste word van drie afdelings gekry insluitend dié makelary, welvaart- en batebestuur asook sy oorsese batebestuursfiliaal Stenham. Die maatskappy verdien ook geld uit die belegging van sy eie kapitaal.
Die aandeelmakelary Peregrine Securities se wins het in die jaar
met 40% gedaal tot R90 miljoen.
In die kommentaar is gesê die besigheid is ’n groot deelnemer op
die plaaslike aandeel- en termynmark en is beïnvloed deur die laer verhandeling.
Namate volume en beleggers se aptyt vir risiko teruggekeer het, het die
aktiwiteit begin optel van die laagtepunt in die eerste halfjaar.
’n Wesenlike verbetering is in die Suid-Afrikaanse
batebestuursafdeling gekry grootliks vanweë die verskansingsfondsbestuurder
Peregrine Capital se goeie vertoning. Dié afdeling se bedryfsinkomste is met 18%
verhoog tot R478 miljoen. Die wins is 40% hoër tot R161 miljoen.
Dit sluit in die welvaartbestuurder Citadel wat se wins met 3%
gestyg het tot R86,8 miljoen. Sy bates onder bestuur het aan die einde van die
oorsigtyd R16,2?miljard beloop.
Die groep se vlagskip-verskansingsfondsbestuurder Peregrine Capital
het nou R3,2?miljard se bates onder bestuur. Die verskansingsfondse wat bestuur
word het bykans almal positiewe opbrengste en prestasiegeld verdien in die jaar.
Die verskansingsfondsbestuurder Big Rock het einde van die
oorsigtyd meer as R500 miljoen bestuur.
Peregrine hou ook 49,9% in Caveo – ’n Suid-Afrikaanse fonds wat in
verskansingsfondse belê. Caveo het R2,8?miljoen se bates onder bestuur
gehad.
Die fondsbestuurder Peregrine iQ, wat geld van institusionele
kliënte bestuur, se bates onder bestuur het afgeneem tot R11,6 miljard, maar het
winsgewend gebly.
Die inkomste van Stenham – wat oorsee fondse bestuur wat in
verskansingsfondse belê en ’n internasionale eiendomsbestuurder het – het met
18% gedaal tot R619 miljoen en die wins met 21% tot R169 miljoen. Dit is
grootliks toegeskryf aan die versterking van die rand.
Stenham het einde van die oorsigtyd $2,7 miljard se bates onder
bestuur gehad terwyl die eiendomsbestuurder $2 miljard se bates bestuur het.
’n Dividend van 31c per aandeel is verklaar.
Peregrine se aandeelprys het met 1,7% gedaal tot R11,80.