Imperial se jong hoof bedank

Hubert Brody, die 48-jarige hoof van Imperial, het bedank.

Volgens ‘n verklaring van die groep, wil Brody meer tyd bestee saam met sy familie. Hy meen ook dit is goeie tydstip vir ‘n nuwe leier om toe te tree gegewe die stewige posisie van die groep en sy buitelandse uitbreidingstrategie wat tans ontvou.

Brody tree in die eerste helfte van 2014 uit. Hy sal aanbly as nie-uitvoerende direkteur by die groep.

Brody, ‘n geoktrooieerde rekenmeester, is in 2000 aangestel as die finansiële hoof van Imperial en het in 2007 as hoof oorgeneem.

Imperial, wat in 1947 as ‘n motorhandelaar in die Johannesburgse middestad gevestig het, het toe ‘n groot skuldlas gehad. Tydens Brody se termyn is dié skuld verlaag deur van sy bedrywighede te verkoop.

Imperial is die twaalfde grootste maatskappy in Suid-Afrika wat omset betref. Die groep het 51 000 werknemers, ook in ander Afrikalande, Australië, Europa, Amerika en Brittanje.

In Suid-Afrika is die groep veral betrokke by logistiek. Imperial bedryf ook motorhandelaars, en verskaf finansiering en versekering. Die groep voer Hyundai- en Kia-motors in, en besit ook die motoronderdele-groep Midas.

Imperial is ook betrokke by motorverhuring en toerisme.


Hubert Brody