Grepe

MultiChoice het DStv BoxOffice, ’n satellietgegronde rolprenthuurdiens vir DStv Premium-kliënte, bekend gestel. Dit gee intekenare met ’n persoonlike video-opnemer toegang tot die jongste rolprente. Hulle kan tot 15 flieks vir 48 uur teen R25 elk huur. Rolprente sal in standaard- en hoë definisie beskikbaar wees, afhangende daarvan of die intekenaar ’n SD- of ’n HD-dekodeerder het. MultiChoice sal later ’n aanlynaanbieding vir nie-DStv-intekenare beskikbaar stel.

Seacom, die operateur van die ondersesekabelstelsel met dieselfde naam, het R100 miljoen in bykomende infrastruktuur in SA geïnvesteer. Dit sluit optieseveselverbindings in wat hy by Dark Fibre Africa koop, asook toerusting waarmee Seacom die netwerk bestuur wat sy KwaZulu-Natalse ondersese landingstasie met twee punte in Gauteng verbind. Volgens Seacom is die bykomende infrastruktuur nodig om in “die voortgesette sterk vraag na breëbanddienste en -toepassings” te voorsien.

Cell C bied nuwe 10 GB- en 20 GB-breëbandpakkette teen koerse van selfs net 3c per MB. Die mobiele operateur stel in Augustus ’n pakket van 10 GB per maand in teen R499 per maand vir ’n kontrak van 12 maande of vir ’n eenmalige vooraf betaalde bedrag van R4 999. Die 20 GB-pakket sal teen R899 per maand vir die kontrak of vir ’n eenmalige vooraf betaalde R8 999 beskikbaar wees. Albei sluit ’n 7,2 Mbit/s-MyZone-roeteerder of ’n 21,6 Mbit/s-USB-modem in. 8ta, Telkom se selfoonoperateur, het onlangs ’n spesiale aanbieding van 10 GB data teen R199 per maand ingestel en Vodacom het ook die pryse van sy standaard-breëbandbondels verlaag.

Vodacom het verlede week nuwe breëbandpryse bekend gemaak waarmee hy sê kontrakkliënte tot 43% op data sal bespaar, en selfs meer as hulle die Night Owl-buitespitstydpromosie gebruik.