Thuthuka 2010 | Verhoog die standaard by skole

DAAR is steeds te veel leerlinge wat nie die wiskunde- en Engels-punte op skoolvlak behaal wat aan hulle toegang tot universiteit sal gee nie en wat met syfer- en geletterdheidsvaardighede sukkel wat hul sukses sou kon waarborg, sê Ajen Sita, voorsitter van die Thuthuka-onderwysopheffingsfonds en oudithoof van Ernst & Young.

"Ons het geleer dat ons deur vennootskappe met universiteite en maatskappye 'n volhoubare finansiering- en werkskeppingsmodel kan skep wat studente in geoktrooieerde rekeningkunde byna werk waarborg. Daarom beplan ons ook om met universiteite en skole saam te werk sodat die skole voederskole vir die universiteite kan word," sê hy.

Dit maak dit vir universiteite moontlik om nouer by skole, hul onderwysers en leerlinge betrokke te raak om loopbane in handel en rekeningkunde te bevorder en deure vir geskikte leerlinge te open.

"As ons dié stroom kan opbou en op skoolvlak in kinders kan investeer, kan ons sorg dat mense wat beter presteer om toegang tot die universiteite aansoek doen; hulle sal 'n groter kans hê om aanvaar te word en deur die stelsel te vorder," sê Sita.

Nes met die ander Thuthuka-projekte en -inisiatiewe is die regering se steun nodig en daar word reeds met hom daaroor gepraat. Thuthuka se sukses daarmee om mense gekwalifiseer te kry en 'n invloed op die beroep te hê, kan hom baie help om ook 'n skoolprogram aan die gang te kry, reken Sita.

Groot vordering word reeds deur die Thuthuka-ontwikkelingskampe vir wiskunde en wetenskap gemaak om die probleem van bevoegdheid in dié vakke op skoolvlak aan te pak, sê Sita.

Op die kampe, wat hoofsaaklik in die Oos-Kaap gehou word, kry leerlinge aanvullende onderrig deur professionele mense. Terselfdertyd kry die onderwysers bykomende steun om hulle met verdere ontwikkeling by te staan, wat weer die volhoubaarheid van die stelsel verseker.

"Ons kies gewoonlik 'n groep skole en vervoer die leerlinge per bus na 'n sentrale punt waar die onderrig gebied word. Ons probeer minstens drie kampe per jaar vir skole in die omgewing hou en probeer vanselfsprekend om nie met die skoolprogram in te meng nie, en daarom vind die kampe gewoonlik naweke of in skoolvakansies plaas."

Sita sê omdat die wiskunde-en-wetenskapkampe so goed bygewoon word, is hulle baie kragtig. Afgesien daarvan dat die kampe die aansien en belangstelling in die beroep op skoolvlak verhoog, het hulle al duisende benadeelde leerlinge gehelp om hul wiskunde- en Engels-vaardighede beduidend te verbeter. Baie van hulle vorder tot universiteit, goed toegerus om geoktrooieerde rekenmeesters (GR'e) te word en verder tot die transformasie van die beroep by te dra.

Opheffingsfonds

Die fonds, wat in 2002 deur die SAIGR gestig en ten volle deur hom besit word, streef daarna om die pogings om die groei van en transformasie in die beroep te bevorder, strategies te rig en aan te dryf. Die transformasieproses kan net geskied as alle belanghebbendes - firmas, hoëronderwysinstellings, studente, leerlinge en die SAIGR - saamwerk.

Thuthuka is 'n Zoeloe-woord wat beteken om te ontwikkel, wat op die aksiegegronde benadering dui waarmee transformasie aangedryf word.

Die Thuthuka-inisiatief het van 'n projek in een provinsie tot meer as 16 projekte oor SA heen ontwikkel (as die nege wiskunde-en-wetenskapontwikkelingskampe van die departement van wetenskap en tegnologie en Thuthuka as afsonderlike projekte getel word).

"'n Beduidende aantal potensiële kandidate word bereik, en die resultate van die programme is 'n aanduiding van die invloed daarvan. Thuthuka sien struikelblokke raak en stel programme in wat doeltreffend daaraan aandag gee. Dit is noodsaaklik dat die projekte groei, en van die fonds se oogmerke is om groter invloed uit te oefen, volhoubare finansiering te verkry en landwyd uit te brei," sê Sita.