KLEINHANDEL-BANKWESE | Nog ’n besige jaar vir die SA

DIE BANKBEDRYF sal in die volgende twee jaar met ’n klompie belangrike sake te kampe hê, sê Cas Coovadia, besturende direkteur van die SA bankvereniging.

’n Bankpraktykkode word in die eerste helfte van aanstaande jaar uitgereik. Dit sal aandag gee aan die aanbevelings wat die Jali-ondersoek na bepaalde banksake aan die vereniging se adres gerig het.

“Dié kode is tans in ’n konsepvorm en is aan die betrokke belanghebbendes uitgestuur vir hul kommentaar, met die doel om die finale praktykkode in die eerste helfte van 2011 aan die ombudsman vir bankdienste beskikbaar te stel,” sê Coovadia.

Die sake het veral te make met die vlak van mededinging, die gemak waarmee van die een bank na ’n ander oorgeskakel kan word en debietorders gekanselleer kan word, om ’n vlak van basiese prysvergelyking te verseker en ’n skryfstyl van eenvoudige taalgebruik te bewerkstellig.

’n Kritieke kwessie vir 2011 is om ooreen te kom op reëlings vir die oorgangstydperk wanneer die nuwe regulasies vir die banksektor in werking gestel sal word. Dit word deur die Basel-komitee oor banktoesig geformuleer en die G20-lande moet daarop ooreenkom. Coovadia sê: “Sowel die nasionale tesourie as die registrateur van banke het aangedui dat SA die regulasies sal toepas, maar gesprekke oor hoe ‘nasionale diskresie’ in die toepassing van die regulasies uitgeoefen sal word, duur voort.”

Roland Sassoon, stigter en uitvoerende hoof van Sasfin Bank, sê wanneer die Basel 3-regulasies binnekort ingestel word, kan dit maak dat banke nog minder maklik geld uitleen. “Wat Basel 3 beteken, is dat banke moet wys dat hulle selfs in die ernstigste krisistye die likiditeit het om ’n tyd lank te oorleef,” sê Sassoon. Dit staan as die “spanningsdruktoets vir likiditeit” bekend.

Sassoon sê: “’n Mens hoop dat SA nie so ’n streng benadering sal instel as Europa en Amerika nie, want die plaaslike banke het die krisis goed deurstaan en kan ’n saak uitmaak om minder streng te wees. Nietemin onderskryf ons die Basel-protokolle en moet ons aan die regulasies gehoor gee. Hoewel ons dit kan probeer verwater op grond daarvan dat ’n ontluikende mark ander uitdagings as ’n ontwikkelde mark het, is dit ’n feit dat dit vir entrepreneurs baie moeiliker sal word om geld te leen,” sê Sassoon.

Die inwerkingtreding van belangrike wetgewing, veral die maatskappywet en die wet op die beskerming van verbruikers, is tot April 2011 uitgestel. n